រយៈពេល១៤ឆ្នាំដោយមានអ្នកវិទ្យាសាស្រ្តអាមេរិចបានស្រាវជ្រាវស្ទង់មតិទៅលើបុរសចំនួនជាង៤ម៉ឺនទៅ៧ម៉ឺននាក់បង្ហាញអោយឃើញថា ការហែលទឹក៣០នាទីក្នុងមួយថៃ្ងអាចជួយប្រឆាំងនិងពន្យាជំងឺមហារីកក្រពេញប្រូសា្តត។

ការស្ទង់មតិប្រការនេះបានអោយអ្នកស្ម័គ្រចិត្តធ្វើការហែលទឹក ជិះកង់ ហាត់ប្រាណនិងសកម្មភាពកម្តៅសាច់ដុំផ្សេងៗទៀត លទ្ធផលឃើញថា ៖ បើសិនជាបុរសគ្រប់រូបអាចចូលរួមលេងកីឡាហែលទឹក៣០នាទីក្នុងមួយថៃ្ង នោះការកើតមានជម្ងឺមហារីកក្រពេញប្រូស្តាតនឹងអាចមានការចុះទាប។ ចំណែកបុរសដែលលេងកីឡាដូចជាការជិះកង់ ការហាត់ប្រាណ និងសកម្មភាពកម្តៅសាច់ដុំផ្សេងៗទៀតដែលមានកម្រិតខ្លាំងហួសហេតុនឹងអាចមានអត្រាកើតមានជម្ងឺមហារីកក្រពេញប្រូស្តាតខ្ពស់ជាង៣០%នៃមនុស្សធម្មតាទៅវិញ។ នេះគឺដោយសារតែការធ្វើលំហាត់ប្រាណកម្រិតខ្លាំងហួសហេតុអាចបណ្តាលឲ្យក្រពេញប្រូស្តាតកកស្ទះឈាម ជម្ងឺហើម និងបណ្តាលអោយកើតមានជម្ងឺក្រពេញប្រូស្តាត។

អ្នកវិទ្យាសាស្រ្តបានបង្ហាញថា ៖ ការហែលទឹកអាចលើកកម្ពស់សមត្ថភាពប្រឆាំងនឹងជម្ងឺ និងជួយជម្រុញឲ្យចរន្តឈាមនិងដំណើរឈាមរត់កូនកណ្តុរផ្នែកក្រពេញប្រូស្តាតមានដំណើរការល្អ ធ្វើឲ្យដំណើរឈាមរត់ក្នុងក្រពេញប្រូសា្តតមានភាពខ្លាំងក្លា ហើយវាអាចជួយឲ្យជំងឺរលាកក្រពេញប្រូសា្តតមានការថយចុះ។

ក្រៅពីនេះ ការហែលទឹកមិនត្រឹមតែអាចជួយឲ្យអ្នកជំងឺមហារីកក្រពេញប្រូសា្តតស្រួបយកឱសថកាន់តែល្អ ហើយក៏អាចលើកកំពស់ប្រសិទិ្ធភាពឱសថផងដែរ។ វាក៏អាចទទួលបានអត្ថប្រយោជន៍ចំពោះជំងឺសរសៃប្រសាទនិងរោគសញ្ញានៃជំងឺសរសៃរប្រសាទចុះខ្សោយទៀតផង។