និយមន័យ

វិធីកករំលាយគឺជាបច្ចេកវិជ្ជាមួយដែលមានភាពចាស់បុរាណ និង នៅក្មេងខ្ចី កាលពីប៉ុន្មានពាន់ឆ្នាំមុន មានគេប្រើប្រាស់ទឹកកកមុខរបួសដែលមានឆ្លងមេរោគ និង មុខរបួសដែលបង្កឡើងដោយឧបករណ៍មុតស្រួចផ្សេងៗ។ ចំនែកឯវិធីកករំលាយ(Cryosurgery)នាសម័យបច្ចុប្បន្ននេះគឺជាបច្ចេកវិទ្យាដំបូងដែលត្រូវបានបង្កើតឡើងតាមរយៈបច្ចេកវិជ្ជាក្នុងការ

ផលិតកាំជ្រួចសំរាប់បាញ់បង្ហោះទៅក្នុងអវកាស ដែលបច្ចេកវិទ្យានេះមានប្រសិទ្ធិភាពក្នុងការបញ្ចុះសីតុណ្ហភាពដល់ក្រោមសីតុណ្ហភាពកំនកនិងបង្កើតថាមពលកំដៅ ។ ឧបករណ៍ប្រើប្រាស់ក្នុងវិធីកករំលាយ(Cryosurgery)ដែលអាចធ្វើការសំលាប់កោសិកាមហារីកបានយ៉ាងសុក្រិតនេះ ត្រូវបានអនុម័តអោយប្រើប្រាស់ដោយFDA(Food and Drug Administration) អាមេរិចក្នុងការធ្វើការព្យាបាលជំងឺមហារីក។

គោលការណ៍

ធាតុពិតនៃវិធីកករំលាយ(Cryosurgery)គឺគេប្រើប្រាស់’’សីតុណ្ហភាពកំនក+ថាមពលកំដៅ’’ក្នុងការធ្វើការព្យាបាលជំងឺមហារីក ហើយវាក៏ជាបច្ចេកវិជ្ជាមួយដ៏សំខាន់ក្នុងការធ្វើការរំលាយផងដែរ។ នៅពេលដែលឩស្ម័នអាកុងធ្វើការបន្សាយចេញដោយល្បឿនយ៉ាងលឿន ចេញពីក្បាលម្ជុល វាអាចបញ្ចុះសីតុណ្ហភាពជាលិកាមហារីករហូតដល់ -120~-165ដឺក្រេដោយធ្វើអោយដុំមហារីកក្លាយជាដុំទឹកកកដោយគ្រាន់តែចំណាយពេលតែប៉ុន្មានវិនាទីតែប៉ុណ្ណោះ ជាលិកាមហារីកនឹងស្ថិតនៅក្នុងភាពស្រេកឃ្លានដោយសារតែខ្វះការផ្គត់ផ្គង់ឈាមនិងអុកស៊ីសែន គួបផ្សំជាមួយវាស្ថិតនៅក្នុងភាពត្រជាក់ប្រហែលជា-165ដឺក្រេផងនោះ បណ្ដាលអោយជាលិកាមហារីកស្លាប់តាមរបៀបដែលហៅថា Coagulative Necrosis។ នៅពេលដែលឩស្ម័នអេល្យូមធ្វើការបន្សាយចេញដោយល្បឿនយ៉ាងលឿនចេញពីក្បាលម្ជុល សីតុណ្ហភាពនឹងឡើងដល់20~40ដឺក្រេមួយរំពេច ធ្វើអោយដុំមហារីកដែលក្លាយជាដុំទឹកកកដែលមានភាពរឹងមាំបែកចេញខ្ទេចរំពេចនោះដែរ សំរេចដល់គោលបំនងក្នុងការបំផ្លាញចោលនូវដុំមហារីក។ គេអាចធ្វើការគ្រប់គ្រងនិងកំនត់បានយ៉ាងសុក្រិតនូវល្បឿនក្នុងការបញ្ចុះសីតុណ្ហភាព តំឡើងសីតុណ្ហភាព រយៈពេល ទំហំ និង រាងរៅនៃដុំទឹកកក។

ការប្រព្រិត្តិទៅនៃការព្យាបាល

ក្រោមការចង្អុលបង្ហាញផ្លូវពីអេកូឬCT ម្ជុលត្រូវបានគេដោតបញ្ចូលទៅក្នុងដុំមហារីកដោយឆ្លងកាត់តាមស្រទាប់ស្បែកជាមុនសិន រួចបញ្ចូលឩស្ម័នអាកុងទៅក្នុងដុំមហារីក ដើម្បីធ្វើអោយសីតុណ្ហភាពនៅក្នុងដុំមហារីកចុះត្រជាក់យ៉ាងឆាប់រហ័សជាទីបំផុត រួចគេនឹងប្ដូរបញ្ចូលឧស្ម័នអេល្យូមវិញម្ដង ធ្វើអោយដុំមហារីកដែលកកក្លាយទៅជាដុំទឹកកកនោះវិលទៅរកសីតុណ្ហភាពដើមវិញ គេនឹងធ្វើរបៀបនេះចំនួនពីរវដ្ដយ៉ាងតិចបំផុត។ រីឯការបញ្ចុះសីតុណ្ហភាពដែលធ្វើអោយដុំមហារីកក្លាយទៅជាដុំទឹកកកនោះគឺគេត្រូវធ្វើការបញ្ចុះសីតុណ្ហភាពរហូតធ្វើអោយដុំមហារីកទាំងមូលនិងកោសិកាធម្មតាដែលស្ថិតនៅជុំវិញវាពី5-10មីលីម៉ែតត្រូវគ្របដណ្ដប់ដោយទឹកកកទាំងអស់។ ចំពោះដុំមហារីកដែលមានទំហំធំ គេត្រូវធ្វើការដោតម្ជុលសំរាប់បញ្ចុះសីតុណ្ហភាពជាច្រើនដើម។ដោយផ្អែកទៅលើភាពចាំបាច់ ការព្យាបាលដោយវិធីកករំលាយមានពេលខ្លះអាចធ្វើពី2-3ដងយ៉ាងតិច។

1.ក្រោមការចង្អុលបង្ហាញផ្លូវពីCTម្ជុលនៃការព្យាបាលតាមរយៈវិធីកករំលាយបានចោះទំលោះចូលតាមរយៈស្បែក

2.ម្ជុលនៃការព្យាបាលតាមរយៈវិធីកករំលាយត្រូវបានដោយចូលទៅក្នុងដុំមហារីកយ៉ាងសុក្រិត

3.ក្រោយពីម្ជុលនៃការព្យាបាលតាមរយៈវិធីកករំលាយត្រូវបានដោយចូលទៅក្នុងដុំមហារីកយ៉ាងសុក្រិតរួចមក គេនឹងចាប់ផ្ដើមធ្វើការព្យាបាល

4.គេនឹងធ្វើការបញ្ចុះសីតុណ្ហភាពវារហូតដល់វាក្លាយជាដុំទឹកកក

5.ក្រោយពីការព្យាបាលចប់សព្វគ្រប់ គេគ្រាន់តែធ្វើការរុំមុខរបួសដែលមានទំហំដ៏តូច អ្នកជំងឺគឺអាចត្រលប់ទៅបន្ទប់ព្យាបាលជំងឺរបស់គាត់ដោយខ្លួនឯង។

ការបដិវត្តន៍នៃប្រសិទ្ធិភាពព្យាបាល៖ ធ្វើការព្យាបាលតែម្ដង មានវិធីពីរប្រភេទ ទទួលបានប្រសិទ្ធិភាពបីយ៉ាង　　ការបដិវត្តន៍ដ៏លេចធ្លោនៅក្នុងវិស័យវេជ្ជសាស្រ្ដនៃការព្យាបាលតាមវិធីកករំលាយគឺនៅត្រង់លក្ខណៈពិសេសថាប្រព័ន្ធបញ្ចុះសីតុណ្ហភាពដ៏ឆាប់រហ័សរបស់ឧស្ម័នអាកុង និង តំឡើងសីតុណ្ហភាពដ៏ឆាប់រហ័សរបស់ឧស្ម័នអេល្យូម ឧស្ម័នអាកុងគឺអាចធ្វើអោយដុំមហារីកកកក្លាយជាដុំទឹកកកត្រជាក់ស្លាប់ក្នុងរយៈពេលតែមួយនាទីទេ ហើយវាមិនមានផលប៉ះពាល់ទៅលើកោសិកាធម្មតាដោយសារសីតុណ្ហភាពកំនករបស់វាទេ។

ក្រោយពីការបញ្ចុះសីតុណ្ហភាពរួចគេនឹងធ្វើការបង្កើនសីតុណ្ហភាពយ៉ាងឆាប់រហ័សរហូតដល់កំរិតមួយ បន្ទាប់មកគេនឹងធ្វើការបញ្ចុះសីតុណ្ហភាពដល់សីតុណ្ហភាពកំនកម្ដងទៀត តាមរយៈការធ្វើបែបនេះឆ្លាស់ចុះឡើងវាអាចបំផ្លាញដុំមហារីកបានយ៉ាងមានប្រសិទ្ធិភាព ។ការបំផ្លាញដុំមហារីកនេះវាធ្វើទៅតាមរយៈការបន្សស់ជាតិទឹកចេញពីក្នុងកោសិកាមហារីកនិងបំផ្ទុះកោសិកាមហារីក ឬបំផ្លាញចោលនូវសរសៃឈាមតូចៗរបស់ដុំមហារីកបណ្ដាលអោយកោសិកាមហារីកខ្វះអុកស៊ីសែនស្លាប់តែម្ដង។

ក្នុងពេលជាមួយគ្នានោះដែរ ក្រោយពីដុំមហារីកត្រូវបានបំផ្លាញដោយវិធីកករំលាយវានឹងបន្សល់នូវជាលិកាមហារីកដែលស្លាប់នៅទីតាំងនោះ ពេលនោះប្រព័ន្ធការពាររាង្គកាយរបស់យើងដែលមានមុខងារក្នុងការប្រឆាំងនឹងមហារីកនឹងធ្វើប្រតិកម្មឆ្លើយតបទៅក្នុងការប្រយុទ្ធប្រឆាំងជាមួយកោសិកាមហារីក។ក្រោយការព្យាបាលកោសិកាមហារីកនឹងកាន់តែឆាប់មានប្រតិកម្មជាមួយការព្យាបាលដោយប្រើថ្នាំប្រឆាំងមហារីកឬការបាញ់កាំរស្មី។ អញ្ចឹងហើយទើបបបានជាគេនិយាយថាធ្វើការព្យាបាលតែម្ដង មានវិធីពីរប្រភេទ ទទួលបានប្រសិទ្ធិភាពបីយ៉ាង។

លក្ខណៈពិសេស

1.អត្រានៃការជោគជ័យខ្ពស់ ផលលំបាកដែលកើតក្រោយការព្យាបាល(Complication)តិច

2.មិនចាំបាច់ធ្វើការវះកាត់ ហូរឈាមតិច មុខរបួសតូច

3.ការព្យាបាលមានលក្ខណៈជាការព្យាបាលដោយប្រើសីតុណ្ហភាព(Physical Therapy) ផលប៉ះពាល់តិចតួច

4.ស្ទើរតែគ្រប់ប្រភេទទាំងអស់នៃដុំមហារីកសុទ្ធតែអាចធ្វើការព្យាបាលតាមវិធីកករំលាយនេះ

5.ការព្យាបាលអាចធ្វើឡើងតាមរយៈវិធីកករំលាយនេះតែឯកឯង អាចគួបផ្សំជាមួយការព្យាបាលដោយប្រើថ្នាំប្រឆាំងមហារីកនិងការបាញ់កាំរស្មី ឬ ការវះកាត់។

6.ប្រសិទ្ធិភាពនៃការព្យាបាលមានភាពល្អប្រសើរ វិធីនៃការធ្វើការព្យាបាលមានភាពងាយស្រួល ការចំនាយតិច អ្នកជំងឺងាយទទួលយកបាន។

7.ការបង្ការការរើឡើងវិញ ៖ ក្រោយការវះកាត់ជំងឺមហារីកមានសភាពងាយរើឡើងវិញ ប៉ុន្ដែក្រោយការព្យាបាលតាមវិធីកករំលាយ ទោះបីជាមានកោសិកាមហារីកនៅសេសសល់ក្នុងខ្លួនក្ដី ជាទូទៅវាមិនងាយរើឡើងវិញក្នុងរយៈពេលខ្លីនោះទេ។