លោក Lin Chi Cheng ប្រធានសម្ព័ន្ធព្យាបាលប៉អាយនៅក្នុងប្រទេសចិន ដែលទើបអញ្ជើញមកបំពេញទស្សនកិច្ចនៅកម្ពុជា បាននិយាយថា ការពិតមន្ទីរពេទ្យក្វាងចូវទំនើបផ្នែកមហារីកគឺជាមន្ទីរពេទ្យដ៏ល្បីល្បាញរបស់ចិនមួយដែលស្ថិតនៅក្នុងសម្ព័ន្ធប៉ អាយ គឺជាសម្ព័ន្ធឯកជនផ្នែកសុខាភិបាលដ៏ធំមួយនៅក្នុងប្រទេសចិន ដែលបានបង្កើតមន្ទីរពេទ្យសរុបជាង១០០ នៅតាមបណ្តាទីក្រុងធំៗនៅក្នុងប្រទេសចិន ដោយបានផ្តោតជាសំខាន់លើការវិនិយោគវិស័យសុខាភិបាលព្យាបាលជម្ងឺទូទៅ មានទាំងជម្ងឺមហារីក ជម្ងឺបេះដូង រោគស្រ្តី កែសម្ផស្ស និងរោគផ្សេងៗទៀត មានបុគ្គលិកជាង២២០០០នាក់។ ដោយមើលឃើញអំពីតម្រូវការជាចាំបាច់របស់អ្នកជម្ងឺនៅកម្ពុជាដែលតែងតែទៅរកការព្យាបាលនៅមន្ទីរពេទ្យក្វាងចូវ ទើបបច្ចុប្បន្ននេះ មន្ទីរពេទ្យក្វាងចូវបានសម្រេចមកបង្កើតការិយាល័យតំណាងនៅក្នុងប្រទេសកម្ពុជាឲ្យមានភាពងាយស្រួលចេញទៅព្យាបាលជម្ងឺនៅមន្ទីរពេទ្យក្វាងចូវប្រទេសចិនដូចជាជួយរៀបចំឯកសារ សំបុត្រយន្តហោះ ណាត់ជួបវេជ្ជបណ្ឌិតជំនាញនៅក្នុងប្រទេសចិន និងឲ្យអ្នកជម្ងឺក្នុងប្រទេសកម្ពុជាយល់ដឹងអំពីសេវាកម្មព្យាបាលជាច្រើនរបស់មន្ទីរពេទ្យក្វាងចូវ ជាពិសេសអ្នកជម្ងឺកម្ពុជាដែលពិបាកទៅរកកន្លែងព្យាបាល។

លោក Lin Chi Cheng បានបញ្ជាក់ថា ដើម្បីកុំឲ្យអតិថិជនកម្ពុជាពិបាកទៅរកការព្យាបាលជម្ងឺនៅមន្ទីរពេទ្យក្វាងចូវក្នុងប្រទេសចិនទៀត លោកបានទៅជួបលោក ម៉ម ប៊ុនហេង រដ្ឋមន្ត្រីក្រសួងសុខាភិបាលរួចហើយកាលពីថ្ងៃទី៣ មីនាកន្លងទៅនេះ ដើម្បីសុំបង្កើតមន្ទីរពេទ្យក្វាងចូវនៅក្នុងរាជធានីភ្នំពេញ។ ការស្នើសុំនេះ បានទទួលការស្វាគមន៍ពីលោកម៉ម ប៊ុនហេង ហើយលោកកំពុងគិតគូរពីការស្វែងរកទីតាំងឲ្យបានសិនរួចទើបលើកជាគម្រោងសិក្សាលម្អិតនិងដាក់ពាក្យស្នើសុំទៅក្រុមប្រឹក្សាអភិវឌ្ឍន៍កម្ពុជាCDC ហើយបើអាចគឺនឹងត្រូវបើកមន្ទីរពេទ្យនេះនៅចុងឆ្នាំ២០១៣ ខាងមុខនេះ៕